蘇斯達搶攻大盤得米

2020-02-13 11:09:08 来源:网络

周五凌晨各大盃賽風起雲湧,等阿King度番條過關心水。西班牙盃4強首回合,皇家蘇斯達主場鬥米蘭迪斯,蘇斯達靠進取型踢法一直過關,西乙球隊米蘭迪斯亦冇包袱,隨時同蘇斯達鬥攻,大盤咪錯過。(周五凌晨4時開賽)

今季皇馬同巴塞兩支傳統勁旅早早於西盃出局,不過比賽吸引程度依然不減,皆因蘇斯達踢法進取觀賞性十足,繼早前8強以4比3淘汰皇馬之後,上仗聯賽再以2比1擊敗巴斯克宿敵畢爾包,走勢強勁。計埋呢兩場波,蘇斯達近5仗全開3球或以上,除瑞典前鋒阿歷山大伊沙克連續6仗有波入之外,挪威進攻好手馬田奧迪加特表現同樣值得留意,今場必定同米蘭迪斯演入球騷,一於吼實大盤。

AC祖記大駁火
另外意大利盃4強首回合,AC米蘭主場鬥祖雲達斯,祖記聯賽頻頻失分,同防線甩漏好大關係,好彩C朗夠弗擔起進攻重責,今場有望同A米鬥數胡,中位數2.5球入球大好路。至於荷盃8強,海倫芬主場對飛燕諾,飛軍前鋒尼高拉佐真遜同史尼斯泰拉近4戰各入3粒,腳風順到冇朋友,近5次對海倫芬取得4勝1和未輸過,有力反客為主。